किल्ल्यासारखं घर बांधणारा शिवप्रेमी : निलेश जगताप

दि ६ डिसेंबर २०२२

छत्रपती शिवाजी महाराजांचा प्रभाव आपल्या प्रत्येकावर आहे. तरी देखील अनेक शिवप्रेमी आपपल्या वेगळया शैलीने आपले शिवप्रेम जपत असतात. शिवछत्रपतींच्या विचारांचा वारसा जपण्यासाठी अनेक जण वेगवेगळे प्रयोग करतात. 

पुणे जिल्ह्यातील दौंड तालुक्यातील खामगाव मध्ये निलेश जगताप या युवकाने छत्रपती शिवाजी महाराजांच्या विचारांचा वारसा जपण्यासाठी व पुढील पिढीमध्ये हा वारसा उतरण्यासाठी या शिवप्रेमीने थेट किल्ल्याच्या आकाराचे घर बांधले आहे. हे घर सध्या नागरिकांचे लक्ष वेधून घेत आहे. 

निलेश जगताप हे शेतकरी कुटुंबातील असून ते व्यवसायाने पशुवैद्यकी करतात.आपल्या घरासाठी एका किल्ल्याची प्रतिकृती या शिवप्रेमी असलेल्या युवकाने तयार केली आहे. घराच्या बाहेरील बाजूस ऐतिहासिक किल्ल्यासारखा दिसणारा चिरा जांभा दगड लावण्यात आला आहे. निलेश यांनी हा दगड कोकणातील रत्नागिरी जिल्ह्यातील पावस येथून आणला असून त्या घराच्या चारही बाजूंना बुरुंजाचा मनमोहक आकार देण्यात आला आहे. तसेच प्रवेश द्वारा जवळ त्या  काळातील स्वागत कमान देखील बांधण्यात आली आहे. तर बाहेरच्या बाजुला कंदीलाच्या आकारांचे दिवे लावण्यात आले आहेत. तसेच घराच्या बाजूने वेगवेगळ्या झाडांची बाग फुलवण्यात आली आहे.

या घराचा दरवाजा हा महाकाय बनवण्यात आला असुन तो छ शिवाजी महाराजांच्या काळात असणारया बांधकामासारखा आहे. घरासमोर पारंपारिक तुळशी वृंदावन देखील उभारण्यात आले आहे. हे घर सुमारे २५७७ स्वकेर फुटामध्ये बांधण्यात आले आहे. या आगळ्यावेगळ्या  घराच्या आतमध्ये देवघर, सभागृह, ३ बेड,किचन,स्टोअर रुम,बाथरुमला आधुनिक टच देण्यात आला आहे.

   या घराबद्दल निलेश म्हणतात की, मी छत्रपती शिवाजी महाराजांचा मोठा भक्त आहे. मला लहान पणापासून किल्ले बनवण्याची , किल्ल्यांवर फिरायला जाण्याची आवड होती. त्यामुळे लहान पणापासूनच माझ्या वर महाराजांच्या विचारांचा वारसा असल्याने मी हे घर बांधले आहे.त्यांच्या विचारांचा वारसा पुढे चालवावा यासाठी माझ्या डोक्यात घर बांधण्याची कल्पना आली. हे घर बांधण्यासाठी जवळजवळ १ कोटीहुन  जादा रुपये खर्च आला असून हे  घर बांधायला दोन वर्षांचा कालावधी लागला आहे. तसेच या घराला आतून सर्व पारंपारिक वाड्यासारखा लूक देण्यात आला असून घराचे छत उतारासारखे करण्यात आले आहे. 

हे  किल्लयासारखे घर बांधण्याचा उद्देश एवढाच आहे की, येणाऱ्या पिढ्यांनी छत्रपती शिवाजी महाराजांचा वारसा पुढे चालवावा. ही वास्तू पाहण्यासाठी लोक आवर्जून भेट देत असुन सोशल मीडियावर देखील या वास्तुचा बोलबाला आहे